《中年好聲音》魏嘉信離巢TVB尋自由 拋開掣肘做返自己：而家我有咩就講.《中年好聲音》參賽者魏嘉信今日（19日）同顏志恒、羅啟豪、丁文俊、李泇霖等人出席兒童音樂劇《我們都in過的第一志願》記者會，受訪時親證已離開TVB，並剖白離巢原因。

講到首次挑戰音樂劇，顏志恒同魏嘉信都話難度高。顏志恒笑言：「因為未試過嘛！」魏嘉信就話自己每日都演緊戲：「返到屋企就係爸爸角色，返工就係返工角色。」佢哋又大爆小演員比佢哋更有經驗，有時綵排忘詞，反而要小演員提點。魏嘉信笑說：「我問個小朋友學咗幾耐，佢話唔係好耐，七年啫。」

對於離巢TVB，魏嘉信解釋：「已經離開咗，我想澄清一樣嘢，我唔係唔想再喺呢方面發展。我一直以嚟都係好畀心機做緊律師正職，因為要顧及家庭，仔細老婆嫩。之後我只會繼續更加畀心機尋找機會，想繼續玩，仲想玩得仲激烈。」顏志恒都話由比賽到而家都冇放棄過廚師工作，為嘅就係無後顧之憂：「最緊要屋企人食得飽着得暖。」

講到離巢原因，魏嘉信強調冇唔開心，反而係為咗自由：「一直以嚟我正職同唱歌有好多人支持，亦有唔支持，所以呢幾年好努力去演出，有時會有掣肘，未必發揮到全部。隔咗幾年，我想重新畀自己新方向，確保自由發揮。以前講嘢會內斂啲，驚有乜嘢對自己唔好，但而家我做返自己，有咩就講，放開好多。」

魏嘉信最後衷心多謝TVB：「之前合作關係非常之好，自己有難題都會同公司傾，佢哋都畀意見。離開嗰陣依然有講有笑，我係真心好感激佢哋。如果嗰日我冇踏入嗰間公司，今日所有嘢肯定不能成事。」強調離巢冇損雙方關係。