吳業坤同細路踢波嚇親：即刻唔想生 自資工作室燒6位數積蓄. 吳業坤（坤哥）今日（14日）出席喺黃埔舉行嘅足球活動，期間同機械人同小朋友一齊踢波。坤哥話同精力旺盛嘅小朋友踢完波之後，「即刻唔想生仔，驚自己搞唔掂！」佢話玩就開心，但要湊就好驚，形容唔知自己性格適唔適合做爸爸，認為需要磨練。坤哥話現階段先享受二人世界，仲話即使養寵物都體會到辛酸，「有小朋友後真係唔知會點！」

坤哥同TMG完約後，自資經營工作室，佢話正籌備新歌，出現好多挑戰。坤哥承認好怕計數：「原來銀行啲數字可以消失得咁快，舊公司之前可以無限量咁出歌係好犀利，而家自己做真係就住就住。」笑指以前經常「拍膊頭」，現階段係該付出就要付出。問到至今燒咗幾多錢，佢坦言燒咗6位數積蓄，幸好有其他工作收入，「自己慳啲，之前打算換車，之後就放棄呢個念頭，實際啲比較好。」坤哥續指，正學習睇數，笑言工作室老闆係老婆，負責收錢，「我就係唯一員工！」不過現時公司赤字。坤哥稍後會同胡鴻鈞去美加登台，佢話老婆都會一齊去，工作之後留喺當地旅遊，返香港就準備拍攝新劇《枱底人生》。TVB