全城熱話伊度半年前已被要求「遠離」森林｜同紐奴反面內情成關鍵伊度正式離任諾定咸

全城熱話伊度半年前已被要求「遠離」森林｜同紐奴反面內情成關鍵

伊度正式離任諾定咸森林，半年前佢已經被告知要「遠離」球會。二月起冇再喺比賽現身，三月有報道話球會叫佢唔好去訓練場同球場，但合約到而家先正式終止。呢位48歲巴西高層，舊年七月離開阿仙奴之後加盟森林，班主馬連拿基斯聘請佢監督足球事務，包括招聘、表現、陣容策略同球員發展，佢亦要兼顧奧林比亞高斯同里奧艾維。結果伊度入主城市球場只有幾個星期，就同紐奴鬧翻，關係破裂亦被視為紐奴離隊關鍵。

紐奴季前公開批評森林轉會政策，伊度加盟後更難適應新架構，結果紐奴開季三場就被辭退，當時佢先帶隊踢入歐霸盃冇幾耐。紐奴係森林上季四位領隊中第一個，之後普斯迪古路、戴治同域陀彭利拿，先後短暫接手。伊度走後森林唔會填補空缺，職責由首席足球官佐治西里亞諾斯接手。伊度做過阿仙奴體育總監五年半，2024年11月突然決定離任。佢係阿仙奴不敗賽季成員，完成園藝假之後2025年4月正式離開。