【娛樂直擊】《中年好聲音4》許雲妮首奪MVP百感交雜　點名多謝范子睿.《中年好聲音4》終極7強誕生，分別係尹景順、尤淑情、許美琪、許雲妮、吳亦偉、蔡宓婕同鄭家聲。當中許雲妮首度攞MVP，賽後發文分享心情：「首先要好多謝Janice頒呢個MVP俾我🥰🙏🏻🙏🏻」

許雲妮透露當刻百感交雜：「攞到MVP我係開心嘅，但同時真係好難受、好唔捨得。見到每一個參賽者都咁努力打最後一場仗，我心入面好難過，點解每個人都咁努力，但始終都要淘汰三個人？所以當時我真係笑唔出嚟😔」

佢續說：「以前第一次睇人哋攞MVP，我心入面都會諗『總有一日我都會攞到』。但一次又一次擦身而過，已經令我冇再去諗呢件事。後來每一次比賽，我只想順利晉級，心入面只有一個目標：上啟德舞台！」

晉級7強，許雲妮多謝各方撐場：「多謝我屋企人，你哋係我最強後盾！❤️多謝所有『小吉』，其實呢晚你哋俾咗好多力量我，我每次同自己講，絕對唔可以令你哋失望。多謝TVB所有鼓勵過我嘅工作人員，因為你哋一直都覺得我係有資格攞MVP嘅人。」最後佢點名多謝范子睿：「呢個MVP我要同范子睿一齊分享！因為你係我心目中嘅MVP！❤️✨」