【专访】高海寧放下討好心態豁達做自己：等人救不如自救　性感花瓶蛻變TVB當家花旦.港姐出身嘅高海寧，因為身材突出，長期被貼「性感花瓶」標籤，但佢默默耕耘超過十五年，2024年憑《新聞女王》許詩晴一角攞TVB萬千星輝頒獎典禮最佳女配角，演技終獲肯定，躋身TVB當家花旦。佢主演嘅《夫妻的博弈》近期熱播，劇中姜幸如一角令佢想起曾經自我懷疑嘅階段，後來悟到冇辦法討好全世界，做返自己反而收穫更多。

《夫妻的博弈》飾姜幸如　一場戲由0崩到100高海寧喺《夫妻的博弈》飾姜幸如，一個被摯友郭柏妍同老公張穎康雙重背叛、集唔幸於一身嘅角色。出場嗰場戲佢目擊老公同郭柏妍喺床上，跟住打郭柏妍、被老公掴巴掌、再被推落馬路俾車撞，一場戲要過驚嚇、錯愕、嬲、委屈、難以置信幾重情緒。

「最難忘係呢場一日拍完，仲要一鏡到底，對我衝擊好大。我入到戲控制唔住自己把力，崩潰由0到100，去到最盡嗰陣衝出去，已經控制唔住想打人嘅衝動，所以一巴一巴掴喺郭柏妍頭上。」佢笑說拍嗰陣兩人冇在意，拍完郭柏妍喊痛，先知入戲太深，即刻道歉。

現實高海寧冇遇過呢種不幸，但角色叫佢有共鳴：「好多人都試過被背叛或者自我懷疑。我最鍾意呢套劇帶出嘅訊息——『與其等一個唔知幾時出現嘅人嚟救自己，不如自己救自己』，好貼合我心態，因為我都咁諗過。」

佢坦承以前係討好型人格，將別人感受放第一位，成日想改變人哋對自己睇法：「但最終唔會成功，唔鍾意你嘅人永遠唔會鍾意你，無論你做幾多都有批評。放低之後，人就輕鬆好多。」

令佢豁達嘅轉捩點去到29歲——嗰陣覺得30歲女人最有魅力，亦清楚自己想要咩。「29歲前成日為別人活，介意別人睇法，但有冇為自己活過？我留長髮因為大家覺得我係女神一定要長髮，但我想試短髮，所以嗰年剪咗，出席活動著褲多過著裙，因為著褲自在。搵返自己之後，外界反而更鍾意我，令我更自信、獨立。」

2008年港姐入行嘅高海寧，多年被標籤性感花瓶，直至今兩年憑《新聞女王》被觀眾睇見。默默耕耘嗰段佢都諗過放棄：「好似點努力都冇人睇到，或者我真係唔夠好。加上我唔應酬、唔主動爭機會，佛系到不得了，會諗自己係咪真係唔適合呢行。」

迷惘期佢甚至打算丟低一切去讀心理學，但就喺呢個位撞正許詩晴，成為事業里程碑，亦幫佢撕走舊標籤。「呢個角色爆出好大力，但我覺得之前每個角色都有出力，冇前面嗰啲積累，未必處理到許詩晴，所以係經驗堆出嚟。」

除咗香港，許詩晴帶佢入內地市場，接劇之餘參加《無限超越班》，高水準發揮獲吳鎮宇、爾冬陞、梁家輝、惠英紅、寧靜等猛人肯定。壓力大但佢慶幸有呢次機會，完節目後仲特登去上郝蕾嘅演技課進修，更懂揣摩角色。佢笑說再有機會想挑戰舞台劇：「學無止境，我鍾意試新嘢，想睇自己可以行多遠、飛多高，我從來唔定義自己。」

事業獲認同，但感情空白，明年踏40歲嘅高海寧對愛情繼續佛系，笑言冇發生嘅事唔會諗，享受當下：「我要嘛唔愛，要愛就100%投入，但要感受到對方都係呢種人，先敢去愛。揀另一半我要好長時間了解先會一起。」外表強勢嘅佢透露，若搵男友希望搵個能拿主意嘅人，「令我唔使喺其他方面顧慮太多」。