【娛樂新聞】《驅魔速遞》開鏡拜神 港式奇幻劇探討人心魔障.無綫新劇《驅魔速遞》日前（14日）在將軍澳電視城舉行開鏡拜神儀式，一眾主要演員包括陳曉華、周嘉洛、戴祖儀、吳偉豪、丁子朗、倪嘉雯、李海銅、王綺琴、樊亦敏、林子善、羅天宇、鄺潔楹等齊齊出席，場面熱鬧。劇集由監製陳萍率領，以奇幻驅魔為題材，講述一班以速遞公司作掩飾嘅驅魔師，接收委託解決各種超自然事件。劇中四位主角陳曉華、周嘉洛、戴祖儀、吳偉豪更穿上橙色驅魔小隊外套，相當醒神。

陳曉華劇中飾演外表冷酷嘅驅魔隊領頭人霍冰冰，因身懷異能而成為團隊主力，更要挑戰連場打戲。首次做打女嘅Hera笑言：「呢套劇係從影以嚟拍得最多打戲嘅一次，首日拍打戲仲覺輕鬆，拍到第三日已經攰到提唔起隻手。」周嘉洛則大讚Hera捱得，連續幾晚通宵打戲都頂得住。嘉洛飾演嘅張喆係協助Hera驅魔嘅角色，打戲相對較少。

監製陳萍透露，劇集刻意挑選四位年輕活力演員擔正，角色幾乎係度身訂造：「我哋係依佢哋嘅特質去度劇本，佢哋加埋一齊要有平衡感，合作有火花，帶出喜感，亦能演繹一個有愛情友情嘅成長故事。」陳萍希望新劇係一套有港式味道嘅驅魔故事，驅魔團隊以速遞公司作掩飾，所選取嘅案件亦貼近香港社會發生嘅人同事。佢強調：「劇中嘅魔其實係人嘅心魔，每個case背後都有個故事，當中夾雜住人情。」驅鬼小隊所用嘅武器亦非傳統桃木劍、驅魔符，而是用上閃光彈等現代武器，配合連場拳腳動作，為觀眾帶來新鮮感。TVB