藝人羅子溢、陳展鵬及賴慰玲近日齊齊獲邀出席一個理財活動，引來全場起哄。子溢對於與展鵬及阿賴「合體」表現雀躍，他解釋﹕「好難得三人同場，況且我同阿賴合作拍完《警是個大佬》後，大家真係好friend，傾湊仔之餘仲會傾戲，佢對演戲嘅熱誠及角色嘅多變，好值得欣賞。」

子溢謙稱自己演戲不是科班出身，但勇於不恥下問﹕「我見人都會問㗎，之前同羅嘉良合作就問到佢怕咗我，哈哈﹗其實演戲最怕主觀，啱嘅大家咪攞出嚟討論囉，即使後輩可能喺生活某部份接觸比我多，咁對角色設定好有幫助，啱都都可以用嚟借鏡。」

談到理財，子溢即表示太太楊茜堯比自己醒目﹕「佢投資好穩陣，唔進取，係『食息派』，佢係我嘅理財顧問嚟㗎。（你完全冇投資？）我乜都唔識，淨係識儲錢，以前我媽咪試過喺區內搵到啲抵買嘅樓盤，最終我都冇出擊，可能錯過咗搵錢機會，但冇計！依家我都開始了解吓啲銀行及保險產品，鬼叫以前冇老婆督促我咩？」