专访丨喬寶寶回港搵食歎被AI廣告搶飯碗 收入暴跌八成.近年移居蘇格蘭嘅喬寶寶，最近趁自己「仲行得走得」兼仲有少少知名度，專程回港接Job，順道同老友聚舊慶生。不過佢慨歎市道轉差，加上廣告客戶紛紛轉用AI生成技術，令佢嘅收入比以前暴跌咗八成：「好彩僅僅可以Cover到飛機票、住宿，咪當悶得滯，返嚟見下班朋友囉。」

雖然搵食艱難，但喬寶寶仍然積極參與電影選角，仲透露導演有意邀請羅家英、汪明荃合作，推廣粵劇文化。56歲嘅喬寶寶長居英國，主要照顧年邁嘅媽媽以及湊孫。佢話媽媽長期臥床，需要家人貼身照顧飲食同大小二便：「印度人好少放老人家去老人院。」

今次回港，喬寶寶其中一個任務係為電影《我的印度男友》導演Sri Kishore嘅新片進行選角。導演支持粵劇文化，想拍攝一齣以香港粵劇為題材嘅電影，講述一位70歲老倌為照顧病危太太而放棄粵劇夢，後來獲朋友相助再圓夢嘅故事。導演最想搵羅家英幫手，但因預算有限，擔心家英哥酬勞太貴：「希望佢肯支持粵劇呢個文化遺產，加埋汪明荃，兩公婆做就very good啦。」喬寶寶則會客串飾演主角嘅朋友，更會搞笑地加入印度粵劇元素。

喬寶寶直言，目前經濟環境差，工作量大減八成：「你諗吓，啲廣告都俾AI代替咗，只係俾兩張相已經可以搞掂，當然同親身上陣比較，收入得返兩三成。」佢語帶無奈話：「長遠嚟講，𠵱家係AI嘅世界，自己唯有搵啲新出路，學習同AI接軌，多做啲同AI相關嘅工作。」雖然搵少一大截，但佢仍然樂觀面對，趁回港之際相約好友敘舊慶生。