黎耀祥龔嘉欣相隔多年再合作鬥嘴 丁子朗拜三次姻緣石未見效 . 黎耀祥、龔嘉欣、丁子朗及倪嘉雯等今日（17日）出席新劇《香港探秘地圖》宣傳活動。黎耀祥與龔嘉欣繼《殺手》後相隔多年再合作，龔嘉欣笑言上次「鬥打」，今次變成「鬥嘴」，佢喺劇中飾演巴辣KOL，但強調現實中嘅自己唔係咁。提到佢早前喺社交平台晒腹肌獲網民大讚「藝術腰」，龔嘉欣話係為新劇角色做嘅準備。黎耀祥透露劇集已拍完近兩年，自己好期待播出，尤其係好耐冇飾演最擅長嘅搞笑角色。佢大讚龔嘉欣多年來變化好大，比以前更靚女。

兩人又話拍攝外景期間冇趁機拜姻緣石，反而爆料指丁子朗同倪嘉雯喺天氣欠佳之下偷偷去參拜。對於《愛‧回家之開心速遞》即將大結局，黎耀祥認為任何處境劇都有完結一日，唔覺意外；佢同龔嘉欣都話若日後有機會，仍希望再接拍處境劇。

丁子朗透露拜過3次姻緣石：第一次希望多啲觀眾睇劇，第二次因阿媽心急自己姻緣，第三次為事業祈求順利。不過佢坦言至今姻緣未見成效，仍在物色對象。倪嘉雯就話摸過姻緣石後，人緣確有改善，但暫時未Feel到姻緣。兩人同樣因敏感令左頸出現紅印，但異口同聲澄清唔係「隔世姻緣」，丁子朗更笑話：「係劫！我唔鍾意姐姐，佢都唔鍾意弟弟。」

倪嘉雯早前成功入選《魔音女團》，對於網民質疑賽果內定，佢坦言：「呢一點我唔清楚，因為唔係由我決定，我自己都唔知最終會入選，但既然佢哋作出呢個選擇，應該有佢哋嘅原因。」丁子朗就話自己有睇節目，唔認為賽果存在內定，又話自己欣賞嘅幾位參賽者最終都順利入選。TVB