黎耀祥龔嘉欣難忘農曆七月十四拍墳場戲 拒評鼎爺家事盼身體健康. 黎耀祥、龔嘉欣、丁子朗、倪嘉雯、孔德賢等今日（17日）現身荃灣，為明晚（18日）首播嘅TVB新劇《香港探秘地圖》宣傳。黎耀祥率領幾位主要演員著道士袍上陣，示範施法手勢時笑言同《魔音女團》嘅動作相似，眾演員又以鏡框玩遊戲扮鬼臉，全場大笑。

黎耀祥同龔嘉欣繼2020年《殺手》後再合作，兩人笑言上次鬥打，今次「鬥咀」——嘉欣飾演專踢爆假網紅騙局嘅畢萍，視祥哥飾演嘅玄學家莊一臣為大騙徒。祥哥自言首次拍靈異都市傳說題材，大讚劇本有趣，最大挑戰係背長對白，間中會爆肚。兩人先後喺墳場、廢校、姻緣石等地取景，祥哥自認唔係靈異體質，多年冇遇過怪事；嘉欣補充拍戲時太專注，冇留意異樣。不過其中一場墳場戲撞正農曆七月十四，嘉欣話睇期表先知，問過劇組係咪一定要嗰日拍，原來佢哋冇為意。祥哥曾問可否改期，但場地已book，只好跟足規矩上香拜祭。

講到丁子朗等人曾去姻緣石拍攝，嘉欣大爆丁子朗連拜3次姻緣石，問佢有冇拜埋一份，佢話當日落雨要行45分鐘先到，已經好攰，冇為意。

對於近日李家鼎嘅家事風波，龔嘉欣同鼎爺合作過《在家宴客60道菜》，佢話唔方便評論別人家事，因為唔清楚究竟係咩事，只希望鼎爺身體健康。被問到拍節目期間有冇發現鼎爺異樣，嘉欣話拍攝緊湊，冇乜空閒時間，鼎爺好錫佢，只見佢好開心咁煮嘢食，冇見過手震，亦冇見過李泳豪或李泳漢探班。黎耀祥自言近10年冇同鼎爺聯絡，唔了解佢家事，認為呢行拍攝緊密，大家都專注工作，好少傾家事。

另外，早前有報道指祥哥兒子被拍到揸靚車戴名錶，祥哥笑言：「已經十幾年前，拎返出嚟報道，其實架車同錶全部都係我嘅，佢唔係炫富，只係喺私人場合分享，完全冇炫耀心態。」TVB