何超蕸追思會丨政商界齊聚送別賭王千金 何超儀憶亡姊感觸：感情永遠不變. 已故賭王何鴻燊與二太藍瓊纓嘅三女、信德集團執行董事何超蕸上月12日離世，終年58歲。由政商及演藝界組成嘅追思委員會今日（17日）喺灣仔一間酒店為佢舉行追思會，設團體致祭、私人追悼禮及公眾致祭環節。大姊何超瓊一早到場打點，同賓客握手接受慰問，心情平靜。家屬何猷龍、黎芷珊等亦陸續抵達，黎芷珊一臉嚴肅難掩傷感。

政商界名人葉劉淑儀、葛珮帆、陳家珮、趙曾學韞等相繼到場，曾任東華三院總理嘅翁嘉穗同楊超成、馬清揚等隨東華隊伍進入會場。范徐麗泰、梁愛詩、趙式芝等亦先後現身，趙式芝強忍淚水讓傳媒拍照。追思會現場以白色同紫色為主，場外設小池塘，布景板寫有「永遠懷念何超蕸女士」，禮堂內外放滿政商各界嘅花牌。何超蕸嘅遺照下放有何超瓊、何超鳳、何猷龍一家，以及何超儀同妹夫陳子聰嘅心型花圈，兩旁投映機播放何超蕸生前功績及政商界合照。委員會仲向到場致意嘅公眾送上印有「M」字小包，飾有紫白色小花束，裝有朱古力。

私人追悼禮結束後，何超儀喺老公陳子聰陪同下接受訪問，佢話三家姐嘅離別非常突然，全家人都好震撼，仲未明白點解會咁。被問到何超蕸係咪因乳癌離世，何超儀話：「佢身上都是癌，但個乳就無癌。」回憶起同家姐相處點滴，何超儀話中學時成日被學校罰，經常搵機會「遁」去洛杉磯搵家姐：「佢對我好好，帶我周圍去、請我食嘢，一啲都唔會怪我點解被學校罰到就嚟無書讀。」佢大讚三家姐隨和、快樂又細心，過時過節記得每個人嘅飲食喜好，全部由佢打點。何超儀感觸話：「家姐，一億次、一千次、一萬次、幾十億次，我哋兩個感情永遠不變！我都要做返佢嘅妹妹。」何超蕸追思会 何猷君奚梦瑶现身何超蕸追思会