愛回家角色回顧｜周嘉洛憑金城安廢青形象入屋 口頭禪「媽咪」好洗腦. 《愛·回家之開心速遞》陪住大家多年，金城安（安仔）呢個角色已經成為唔少港人眼中「廢青」嘅代名詞——對學業同工作毫無熱情，生活重心除咗打機就係瞓覺，對社會冇乜建樹。

金城安仲喺島大讀書時接受突擊採訪，幾十個中文字讀錯七個，「水滸傳」變「水許傳」，「別墅」變「別野」，被全城笑「文盲」，成為劇集名場面之一。佢又試過做「翻版譚道德」，為咗參選「道德先生」一改盞鬼形象，笑料百出。 金城安仲係熊家公認嘅「破壞王」，無論電器定長輩計劃，經佢手多數變災難，好心做壞事係日常。當佢自作聰明偵破劇中「案件」時，最鍾意講：「碰！謎底已經解開！」令人哭笑不得。 不過安仔心地善良、樂天知命，雖然成日同屋企人鬥嘴，但始終孝順，尤其同阿媽熊尚善（滕麗名飾）係劇中最受歡迎嘅母子組合之一，無厘頭互動成日令觀眾笑到收唔到聲。

金城安最令人又愛又恨嘅係佢嗰套無厘頭邏輯——每次闖禍或畀阿媽追問，總能嘴甜舌滑諗出荒謬藉口推卸責任，或者拉好兄弟朱凌凌（吳偉豪飾）落水，身上冇「擔當」二字可言。

佢嘅人生格言亦好直接：「只要我夠廢，就冇人可以利用到我」、「努力唔一定會成功，但唔努力真係好舒服」、「我嘅人生實在太多挫折，我好攰，由佢擊敗我。」 雖然不學無術、毫無上進心、凡事得過且過，成日被阿媽「打」到飛起，但呢種性格成功塑造咗安仔知足常樂、毫無城府嘅一面。佢對「躺平」嘅追求，亦令唔少為高壓工作、生活頭痛嘅觀眾搵到共鳴。

而且金城安唔係一味伸手問屋企要錢，佢喺劇中打過多份工，堪稱職場「散打王」。除咗幫細姨熊心如（蘇韻姿飾）嘅補習社做文書，仲喺「好爸Bar」做侍應、喺「速熊」送貨、喺律師樓、接龍集團、片場做兼職，甚至幫送水輝嘅囝囝補習。雖然通常破壞多過建設，但都證明佢唔係一無是處。

身為熊家地位最「低」嘅成員，金城安每日生活就係不斷挑戰長輩底線。二姨熊若水（呂慧儀飾）經常反白眼：「大學咁教你㗎？」公公根叔（劉丹飾）成日鬧佢冇出息，但心底最錫呢個外孫。

每逢阿媽熊尚善準備大發雷霆，金城安就會發揮「戲精」本色：扮女人、扮可愛，甚至賴皮攬實阿媽撒嬌：「媽咪，我愛你呀！」一句「媽咪～幫吓我啦～」，就令熊尚善使盡渾身解數幫手，相當無奈又好笑。

至於感情，金城安同Bonnie（林凱恩飾）嘅「安Bon CP」係最受歡迎組合之一。觀眾見到佢最專情嘅一面——為咗女朋友可以咬牙背《道德經》，忍受準外父嘅古板家規。用行動證明佢可以為咗守護感情克服天性懶散，變成懂得尊重同付出嘅男人。雖然初戀暫時分手，但佢為愛改變嘅決心，依然係劇迷心中好寶貴嘅部分。

仲有「安凌CP」——金城安同朱凌凌（吳偉豪飾）呢對歡喜冤家。金城安對兄弟嘅方式係不斷製造麻煩，要對方幫自己孭黑鑊。但關鍵時刻佢一定會挺身而出，用最無厘頭嘅方法俾最溫暖嘅支持。TVB