施明設靈｜李家鼎與大仔隔空對罵 李泳豪花圈缺太太名字

李家鼎前妻施明上月因肺炎病逝，終年74歲，今日（22號）於大圍一間殯儀館設靈。靈堂佈置簡潔，遺照係施明半側身相片，橫匾寫上「轉生淨土」。大堂正中放置大仔李泳漢夫婦嘅花圈，兩側分別係鼎爺同細仔李泳豪嘅花圈。不過，泳豪所送花圈上嘅太太名字疑似被消失，而靈堂外寫明「私人聚會 非請勿進」，各界致送嘅花圈則放滿內外。

喪禮前夕，鼎爺與大仔李泳漢隔空對罵。鼎爺直斥「點解會養個咁嘅仔」，又透露每月畀大仔一家5萬元以上，更以「人無三尺高，肚裏三把刀」形容大新抱Conny。鼎爺不滿家屬花圈中拒絕落細新抱Agnes個名，無奈表示唯有自己再做一個，同時唔會出席解穢酒。

李泳漢隨即反擊，指鼎爺明顯想幫細新抱Agnes洗白，等弟婦可以名正言順入靈堂。佢強調鼎爺所講並非事實，話當初喺私房菜打工，每月大約萬五蚊人工係由公司負責。TVB