曼寧加喺個幾星期之前，大約4月5號接受米蘭體育報嘅專訪，回顧咗佢嘅球員生涯同球場外嘅生活，不幸地亦都係最後一次…

佢有提到喺祖雲達斯同保方共事嘅經歷，認為可以作為對方嘅副手係佢嘅榮幸，亦都感覺保方偉大，但又唔會令佢覺得自卑，更加讚嘆對方嘅沉着同冷靜。

呢位奧地利人最後一季效力祖雲達斯，正正係干地嚟到執教嘅第一季 （2011-12），佢提到干地一開始就令佢留下深刻印象，並且喺開頭係唯一一個相信球隊能夠贏到意甲冠軍嘅人，因為之前兩季球隊都排第七，球會做咗一啲錯誤同令人困惑嘅決定，而干地就令到球隊重上軌道。退休之後曼寧加重操故業，做返佢開始球員生涯之前嘅工作，木匠。佢話呢份工作令佢明白要付出汗水同努力，並且令佢覺得快樂。佢形容而家嘅足球更加着重潮流同商業考慮，但係佢自己就連 IG 都冇。

曼寧加話現時更衣室裏面，啲人更加關心髮型同埋社交媒體多過努力訓練，令佢好懷念好似迪比亞路同保方呢啲人物。 RIP