「得咗啦，我哋得咗啦！」

活塞同湖人喺季後賽行到幾遠，當然未知，不過NBA經過盧卡當錫（Luka Doncic）及根寧咸（Cade Cunningham）經理人抗議後，就佢哋嘅「特殊狀況」（Extraordinary Circumstances Challenge）重新審視，決定網開一面，令佢哋可以符合本來需要上陣65場先能夠得獎嘅資格。

根寧咸今季上陣63場，但去到季尾因為爆肺而缺陣12場，令本來大有機會入選最佳一隊嘅佢，拒諸門外；至於盧卡當錫今季上陣64場，而佢有兩場比賽因為女兒出生而缺席，經聯盟與球員工會磋商後，決定容許兩人成為個人獎項候選人，亦避免聯盟得分王及東岸一哥活塞嘅主將，因為上陣場數而不入最佳陣容嘅尷尬局面。

至於上陣60場嘅艾活士（Anthony Edwards）亦有上訴，更想搵獨立仲裁人裁決，但已被NBA駁回。

呢個判決料會喺季後成為案例，等65場規定加入更多嘅補充，例如重創或者係個人原因等，可獲通融，為咗兩全其美，既保收視又令球員感到公平，相信有排微調。

文章擇自- 仙道彬手記🏀