絕地反勝快艇再鬥太陽｜向勇士三老脫帽致敬

今日勇士反勝快艇，特別激動，因為喺第四節見到加起來過百歲嘅三老：居里（Stephen Curry）、格連（Draymond Green）及荷福特（Al Horford）輪流發威，尤其係DG最後防守Kawhi，連續兩球關鍵偷波，可以講係向全季嘅批評正面還擊。

三老嘅表現，令人唸到《三國演義》中嘅黃忠同嚴顏，如何喺被睇低嘅情況下勝出定軍山之戰，只係勇士任務未完，周六還要再鬥同樣擅打小球陣嘅太陽，希望到時其他年輕球員，可以好似山度士（Gui Santos）般多多幫忙。

孔明曰：「將軍年近七十，如何不老？」忠趨步下堂，取架上大刀，輪動如飛；壁上硬弓，連拽折兩張。孔明曰：「將軍要去，誰為副將？」忠曰：「老將嚴顏，可同我去。但有疏虞，先納下這白頭。」

勇士與熱火一樣，過去幾年都係附加賽常客，連同今日對快艇，已經係第四次參加生死戰，上季更成功擊敗灰熊，以第七種籽打入季後賽。只係今次難關重重，幾位主將都未完全傷癒，但係去到生死關頭，隨住定海神針居里發威攻入35分，加上荷福特嘅三分炮，以及格連兩記關鍵偷波，終於喺不可能下反勝快艇126-121。勇士先過一關，周六將鬥太陽，爭奪西岸季後賽最後一席。

對好多勇士球迷來講，就算最終獲得附加賽資格出戰，延續咗一絲總冠軍希望，但仍好難笑得出，因為現實來睇，球隊已是強弩之末，與幾支西岸熱門球隊相比，根本係天與地嘅差別。由選秀、新人嘅培養到交易嘅眼光，都遠不如2010至2020年間果十年，當中教練卡爾（Steve Kerr）更被認定係浪費咗居里最後幾年巔峰嘅最大罪人。

-------------------------------------------

文章擇自- 仙道彬手記🏀