陳若思拍殺貓戲怕被千夫所指 孖廖慧儀齊扮傻避談胡美貽男友林孝賢.陳若思同廖慧儀喺《正義女神》入面都係飾演少年犯。陳若思喺劇集後期會有一場殺貓嘅戲，本身有養狗嘅佢坦言覺得好難，仲話壓力好大，因為知道香港人好鍾意寵物，覺得播出嗰陣一定會俾人千夫所指，到時大家一定好憎佢。而廖慧儀就話自己喺劇中會有一場好血腥嘅戲，都係第一次拍呢類型嘅戲，由於要拍多幾個版本，所以要不停抹血不停拍，都幾辛苦。

提到兩人嘅好友胡美貽最近喺社交網高調晒出喺林孝賢市值4億嘅九龍塘獨立屋慶祝32歲生日，問佢哋當日有冇出席生日會，兩人話有同對方收工後喺餐廳食飯慶祝。至於有冇見過對方男友，兩人即時扮傻，陳若思話自己腦霧，廖慧儀就話自己金魚記憶。問到兩人一齊封口係咪怕影響胡美貽戀情，陳若思話：「人哋嗰啲嘢我都唔理嘅，因為我係好自私嘅人，只理自己嘅事。」TVB