【On.cc】古天樂被雷射筆射眼　本尊絕核親回對眼識射死光

影帝古天樂今日（28日）現身尖東出席剪綵活動，吸引大批粉絲到場追星。原來古仔25年前曾與該品牌合作，當時與一批員工合照留念，想不到事隔多年照片上的員工今日集體現身，情懷滿滿。

古仔由25年前的上位小生，躍身變身今日娛樂公司老闆。他有感而發表示：「我啲員工好多唔只做咗25年，已經好似屋企人一樣。（有冇難忘嘅回憶？）回憶一定多，尤其是當年紀大，可能大家多咗身體嘅病痛，所以仲可以合作到，應該好珍惜，都有個員工前幾年走咗（過世）。（好傷心？）係，但年紀大冇辦法。」

談到日前應邀擔任保險公司新春聯歡表演嘉賓，炒熱全場氣氛，問到他是否近日勤於練歌？古仔笑謂：「沖涼沖耐咗囉。（唱自己歌？）睇吓邊個唔鍾意（歌手）就唱吓佢。（近排有邊個唔鍾意？）秘密。（好多粉絲期待你開演唱會。）諗吓先啦，依家我去卡拉OK都唔會唱歌。」他又主動提到有小朋友於社交網高唱《天命最高》：「我都回覆佢，喺網上我每日回覆3個人。（網上見到你同宣萱合作拍嘢喎。）我有留意到（post），拍咩唔講得，嚟緊我哋仲會集齊所有嘅演員，四月初為電視劇《尋秦記》大結局做直播，同觀眾互動。」

至於日前出席導演會春茗，於酒店門外遭人用雷射筆射向眼睛，古仔表示完全沒感覺：「真係唔知道，我睇張相第一個反應，會唔會係自己對眼射死光出嚟，其實我行得好快，佢應該好難跟到我雙眼。（唔呼籲吓唔好咁做？）梗係唔好啦，真係會傷害到人，好彩我有戴眼鏡。」他又預告數天後將有新工作公布。

身為古仔鐵粉的麥美恩擔任大會司儀，心情興奮可想而知，她更帶同偶像的黑膠唱片到場索取簽名，並一面陶醉「擁抱」它讓記者拍照。談到古仔，她笑說：「我呢個『追星天花板』並唔係浪得虛名，頭先喺後台同古生都有對話。（對住佢講嘢係咪怕醜？）係嘅，我好斯文咁邀請佢幫自己簽名，嗰刻好感動。其實由買呢張黑膠唱片開始，心情相當忐忑，好似過山車咁緊張，昨晚都瞓得唔好，因為今日個活動好多嘢要兼顧，自己又有私心唔知做唔做到（索取簽名）。」她坦言自《寵物情緣》開始已對住古天樂情有獨鍾：「好鍾意佢嗰種陽光氣息，同埋得意嘅性格。（依家嘅佢呢。）不得了，頭先已經撳住自己唔好叫Daddy（對古仔暱稱），好彩我專業咋，多謝客戶幫我完成咗自己其中一個心願。（有冇同佢講想同佢拍嘢？）冇，等我再努力啲，或者開個古生系列（節目）。」

大合照～

古仔派心！

古仔好精神！

講番雷射筆事件。

麥美恩係古仔Fans。