藝人岑麗香（香香）與型男栢天男在新劇中首合作，相隔4年再重投幕前的香香笑指已洗濕個頭兼得老公開綠燈，日後會繼續拍劇，期望新劇令她「名留青史」，而栢天男自認跟香香默契好，有計劃二搭演愛情喜劇。
岑麗香（香香）相隔4年拍劇，與栢天男（Adam）於HOY TV新劇《我愛九龍城》中飾演情侶。講到再出山拍劇，香香坦言全因被故事打動：「故事係講九龍城，係一個好有歷史感嘅地方，我以前都聽過好多關於九龍城寨嘅故事，我好想成為歷史其中一分子。」Adam即大拋書包指香香想「名留青史」。為此，香香難免犧牲照顧家庭的時間，幸老公未有詐型，她揚言自己已「洗濕個頭」，往後會繼續拍劇：「好難叫我停，就好似打開咗團火，唔想熄咗佢，老公都接受咗。」
今次雖然是香香與Adam首度合作拍劇，但原來二人早有淵源，Adam表示：「我之前做模特兒嘅時候，喺活動上要帶呢啲大明星出嚟。」香香即向對方派高帽：「我記得，你咁靚仔點會唔記得。」兩人同在外國長大兼中文麻麻，問到會否因此而特別投契時，香香坦言合作舒服：「因為大家中文差唔多程度，我NG嘅時候，我會諗佢都會㗎啦，我講笑啫！」她指由於二人都要把劇本翻譯及拼音，每次都要比其他演員多花時間及工夫，所以大家會感同身受，她自嘲：「我哋唔會即興改對白，因為我哋冇咁多能力。」Adam直認兩人有默契：「諗緊同導演、編劇商量，再拍愛情喜劇，睇吓係電影定電視劇。」
兩人除了「同聲同氣」外，亦同是「DIY」達人，香香不時在社交網分享將舊衣裁縫成新衫的短片，她直言想向設計方面發展：「我細細個就識車嘢，大學修讀時裝設計，夢想有自己嘅品牌，畀少少時間我，我會努力。」至於Adam就喜歡將廢棄物料回收，動手變成新家具，但就無意將興趣變事業。
