臥底嬌娃｜陳瀅拍打戲致周身傷 搵物理治療師啪骨
炎明熹被雪藏 鍾柔美否認工作全接手
陳瀅、鍾柔美（Yumi）昨現身觀塘出席無綫新劇《臥底嬌娃》煞科宴。陳瀅在劇中飾演一名警察，同時亦係空手道高手，與馬貫東不少對打戲，而日前拍攝最後的戲份時，遭馬貫東狠下毒手打到受傷：「其實拍呢套劇，當中係有好多動作場口，係打到周身傷，始終整到啲關節位，唔係好似以前後生咁快會好返。以前細個啲會好搏命，連啲師傅都知我會好用力去打，但到我而家大個啲，就知道係唔得嘅，原來係要錫身啲，因為你會發覺受傷之後原來係好難康復，後生嘅時候就會好快康復。而家我都搵咗物理治療師幫我啪返好啲骨，因為有時啲動作唔靚，係會搞到啲骨移位。」
對於有傳炎明熹GIG被雪後，工作由她及姚焯菲接手，Yumi受訪表示：「其實工作量都係咁囉，都係平平常常咁，都係跟公司嘅安排，而自己都係一路返學就一路Keep住做嘢。而最近我都有同Gigi成班朋友趁住哈囉喂一齊去主題樂園玩，大家都玩得好開心。（有冇順便關心吓佢？）其實我哋係好關心對方，不過嗰日我哋盡情出嚟玩，變咗我哋就冇傾工作方面嘅嘢，反而有傾學校方面係點囉，但就冇點講咁深入嘅事。」
