【On.cc】陪古天樂睇《尋秦記》　宣萱狂跳「拜神舞」笑爆嘴

藝人古天樂、宣萱今日（19日）凌晨踏正12點準時開直播，陪觀眾一齊睇電視版《尋秦記》，惟一度畫面冇聲音，Live咗幾分鐘就結束，宣萱隨即留言「處理中」，未幾二人再度出現，但畫面不及第一個直播高清，宣萱急笑言「望落靚啲」，非常識做，即被封「直播天才」，咁啱今集亦播到宣萱及林峯首次出現嘅片段。

古天樂、宣萱一齊開Live，曾一度冇聲。

今集咁啱播到宣萱首次現身畫面。

林峯都粉墨登場。

今集幾位主角好齊人。

古天樂直言從未試過做Live，已經把握時間學及搵唔同人幫手，並稱事前已經試過不少次，奈何仍然出現技術故障，佢話：「呢個世界就係咁簡單，預備好一切，總有啲嘢要發生，我哋已經盡量去解決，用最簡單方法同大家直播，好開心終於解決到，就好似《尋秦記》咁隔廿幾年終於解決到啲問題上映。」

Live期間有網民提議古天樂唱歌，宣萱隨即和應，仲起埋身為古天樂伴舞，當古天樂只唱咗幾句《今期流行》，宣萱即去佢身後做招牌「拜神」動作。成個Live古天樂非常認真睇劇，宣萱就掛住睇留言，又坦言已經忘記好多拍攝時嘅片段，但仍記得每次拍外景時「搞到全身臭晒先返酒店」。當電視播廣告時，宣萱就向古天樂詐型，表示咁夜開直播令佢夜瞓，透露自己每晚要浸腳、刮面嘅養生習慣，之後二人再研究刮面，傾到一當都笑指自己似直播帶貨。

古天樂與宣萱重溫《尋》期間，看到一幕江華飾演的「連晉」殺人後離開事發現場，江華在鏡頭前抹嘴角，引發古天樂與宣萱爆笑。古天樂見宣萱笑不停即笑說：「咦，你好似有啲疑問咁，我知你想講咩，算喇，忍住唔好講！唔好講，我知你想講乜。」宣萱表示：「你咁叻嘅，即係見到個背脊都知我前面做緊乜！」

全程古天樂不時叫宣萱專心睇電視，整個互動模式十足老夫老妻一樣。未幾古天樂又細心問宣萱要唔要飲水，但對方表示已準備養生飲料，又對鏡頭表示自己氣血唔夠，加上自己都唔想觀眾見到佢咁快殘，所以要好好養生。在直播尾聲時，古天樂再送出黑膠唱片，直播近一個多小時便結束。

古天樂話自己一早問定晒人點樣開Live。

宣萱唔只和應叫古天樂唱歌，自己仲跳埋舞。

宣萱功架十足。

宣萱施展舞功。

宣萱相當出色。

宣萱狂跳「拜神舞」。